Logo
 
Takorluukkat aaqqissuussaanerullu ilusissaaAnguniakkatIlloqarfiit NunaqarfiilluAsimi nunaUani nunaminertamik qinnuteqarsinnaavutitIlloqarfiit NunaqarfiilluTusarniaanermi pilersaarusiat nutaat

Qassimiut


Kommune Kujallermi Qassimiut avannarpasinnersaavoq, piniarnikkut aalisarnikkullu periarfissagissaartumilu inissisimalluni, 2016-imilu miss. 26-nik innuttaqarluni. Qassimiuni kulturikkut aallaavilinnik eriagisassaqqissunik illoqarnikkut peqarluarpoq. Taamatuttaaq nunaqarfiup eqqaani itsarsuarnitsanik annertuumik assaasoqarnikuuvoq. Aammattaaq Naalakkersuisut siulittaasorisimasaata Jonathan Motzfeldtip Qassimiuni peroriartorsimanera nunaqarfimmiunit tulluusimaarutigineqartarpoq.

 

Inuit illoqarnerlu

2004-mi nunaqarfimmi innuttat miss. 50-ioriarlutik tamatuma kingorna amerlassusaat appariartuaarsimapput, 2016-imilu 26-ullutik, tassa ukiut aqqaneq-marluk ingerlanerini affaannanngungajassimallutik. Ukiuni kingullerni agguaqatigiisillugu ukiorineqartartut qaffakkiartorsimapput.

Nunaqarfimmi katillugit 40-nik illoqarpoq. Ukiut siuliini inuerukkiartorsimanera peqqutaalluni, illut arlallit inoqanngillat.

Nunaqarfimmi utoqqarnut najugatigiiffeqanngilaq, utoqqarnulli tulluuttunik najugaqarfeqarlunilu inissiaqarpoq. Utoqqaalli amerlanersaat namminneq angerlarsimaffimminniiginnarnissartik qinertarpaat, utoqqarnullu tulluarsakkamik inissiamik angerlarsimaffimmilu ikiorteqarnermik neqeroorutit atorusunneq ajorlugit. Utoqqaat illuanni oqoqartoq paasineqarmat inuerutsinneqarpoq 2016-imilu imaarneqarluni.  

 

Umiarsualivik inuussutissarsiornerlu 

Qassimiuni umiarsuarnut imarpikkoortaatinut talittarfeqarpoq, tunissassiorfeqarluni pisiniarfeqarlunilu (Pilersuisoq).  Nunaqarfimmi tunisassiorfik ukiut kingulliit marluk ingerlanerini nutaanik piginnittortaarpoq nutarsarneqalunilu. Nunaqarfimmi piniagassarpassuaqarnera tunisassiorfiullu sulisussanik amigaateqartuarnera peqqutaalluni tunisinissaq tunisassiornissaminngarnit killilersorneqarneruvoq.  Nunaqarfiup imminut napatinnerulersinnaanissaa amerlanerusunillu sulisoqarnissaa siunertaralugu aalisakkanik tunisassiorfiup allilerneqarnissaa takorluugaavoq.

Nunaqarfimmi saarulliit inuussutissarsiornikkut periarfissatut pingaaruteqarsimaqaat. 2010-mi aasaanerani Kommune Kujalliup nunaqarfimmiut Qassimiut avannaanni panersiiviliornissaannik tapersersorniarlugit aalajangersimavoq.  Tunisassiassaaleqinerup nalaani ataasiakkaanik suliffissaaleqisoqarsinnaasarpoq.

 

Sunngiffik pisortallu sullissiveqarfii

Una toorlugu nunap assingini illut teknikkikkullu atortorissaarutit takusinnaavatit

Qassimiuni atuarfeqarpoq, oqaluffeqarluni, iliveqarfeqarluni, katersortarfeqarluni nunaqarfiullu meerartaanut arlalinnik minnerusunik pinnguartarfeqarluni.  Pilersaarusiortoqarnerata nalaani atuarfimmi atuartut marluinnaapput, piaarnerpaamillu nalilersorneqartariaqarpoq atuarfik atuarfittut atatiinnarneqassanersoq, imaluunniit nunaqarfiup meerartaasa allatut atuartinneqarnissaannut neqeroorusiortoqassanersoq. Piffissami pilersaarusiorfiusumi oqaluffik naammaginartumik pitsaassuseqartutut naliliiffigineqarpoq.

Qassimiuni Illu Sullissivimmik peqanngilaq.  Innuttaasunik kiffartuussinerit katersortarfimmmut, uffarfimmut ukiualunnguillu matuma siorna atuarfitoqqamut agguataarneqarnikuupput, taannalu sannavinngortinneqarlunilu nunaqarfiup allaffiatut atulersinneqarpoq.  Illut pingasut akuerineqarsinnaasunngorlugit iluarsaanneqassanersut imaluunniit illumik sullissiviliortoqassanersoq naliliisoqassaaq. Katersortarfiup kiassarneqannginnera peqqutaalluni atorneqarsinnaanera killeqarpoq.

 

Kulturi eriagisassallu

Qassimiuni kulturikkut kingornussassaqarluartoq malunnarpoq.  Ujaqqanik quersualiatoqaq 1800-kkunneersuuvoq. B-81-ip silataa iluarsarneqarnikuullunilu eqqissisimatitaavoq.  Atuarfitoqaq B-111-imiittoq eriagisassaqqissuuvoq, aserfallassimanerali peqqutaalluni atorneqarneq ajorpoq. B-76 Pilersuisup pisiniarfeqarfia illulu B-86 najugaqarfiusoq illuupput kusanartut nunasiaataanerup nalaaneersut eriagisassaqqissut, sulilu atorneqarput aserfallatsaalineqartarlutillu.  Kiisalu oqaluffik B-112 atuarfillu B-480 eriagisassaqqissut nutaajunerusut.

Aammattaaq qanga najugaqartariaaseq malilluinnarlugu issuinnarmik illuliortoqarnikuuvoq.

  

Avatangiisit pilersuinerlu

Nunaqarfimmi eqqakkanut ikuallaaveqarpoq, eqqakkallu tassani ikuallanneqartarput.  Eqqakkat avatangiisinut ulorianaateqartut, ilagalugit uuliakut, batteriit akkumulatorillu immikkoortinneqartarput, qallunaallu tigooqqaaviinut umiarsuakkoortinneqartarlutik. Eqqakkat ikuallanneqarsinnaanngitsut eqqaavissuarmi immikkoortiterlugit inissinneqartarput.

 

Imikoorutaasup nunamit kuuffilianilluunniit illunut kuuttarnerani isugutaap ajornartorsiutaasarnera peqqutaalluni arlaatigut eqqakkat kuuffilersuilluni aaqqissuussinissamik eqqarsaat qaqilerneqarnikuuvoq. Nunaqarfimmi kuuffissualiortoqarsinnaanissaa ilimananngilaq, kisiannili erngup qaarsuni kuuttup arlaatigut qanoq iliuuseqarfigineqarsinnaanera misissorneqassaaq. 

 

Nunaqarfimmi innaallagissiorfeqarpoq. Nukissiorfiit ingerlanneqarnera akisussaafigivaat. 2009-10-mi innaallagissiorfik nutarterneqarpoq. 2007-imi innaallagissap aqqutai tamakkiisuunngikkaluamik nutarsarneqarput.

 

Nunaqarfik imissamik tatsimeersumit avannaata kitaata tungaaniittumi pilersorneqarpoq.  Imeq ruujorikkoortillugu kuutsitsivinnut ingerlatinneqartarpoq. 2009-mi imeqarfiup ilaa sorujuiaasersorlugulu qinngornernik ultraviolettiusunik saliivilersorneqarpoq, taamaammat piffissami pilersaarusiorfiusumi allatigut qanoq iliortoqarnissaanut pilersaarusiortoqarsimanngilaq.  2008-mi erngup aqqutaanik iluarsaassisoqarpoq, nunaqarfiullu annersaani erngup aqqutaanik peqarpoq.

Nunaqarfimmi illut kissarsuutinik uuliatortunik kiassaasersorneqarput.

 

Angallannikkut pissutsit

Nunaqarfimmi qiterpasissukkoortumik aqqusineqarpoq. Pisuinnarnut aqquserngit ilaat flisilersorneqarnikuupput. Flisilersuineq nangeqqinniarneqarpoq. Ukiukkut erngup qerruttarnerata ajornartorsiutaasarnera aqquserngullu ilaata quatsertarnera peqqutaalluni angallavigiuminaassisarpoq.  Nunaqarfimmi aqqusinilerisut aqqusinerni aaqqissuussisoqassatillugu iliuuseqartassapput, siunissamilu aqqusinissaajumaartussat ilusilersornissaannut peqataatinneqartassallutik.  Nunaqarfik biileqanngilaq, kisianni truckeeraqarlunilu 4-hjuleqarpoq.  Nunaqarfiup avataatungaani qulimiguulinnut mittarfeeraqarpoq.

Nunaqarfimmi oqarasuaatinut attaveqaasersortittoqarsinnaallunilu internettimut attavilertinnissamut periarfissaqarpoq. 

 

Nunaqarfiup ineriartortinneqarnissaanut iliuusissatut pilersaarutit

Qassimiuni aalisarnermik piniarnermillu inuussutissarsiornissamut suli periarfissaqarpoq, taamaammat talittarfimmik tunisassiorfimmillu aserfallatsaaliuisoqarlunilu ineriartortitsisoqartuarnissaa pisariaqarpoq. Nunaqarfimmi sulisussaqassappat nunaqarfiup pilerinarsarnissaa kissaatigineqarpoq. Innuttaasut takornariallu takkukkummaartussat eqqarsaatigalugit iliuuseqarnikkut tamanna piviusunngortinneqassaaq.  Tassunga atatillugu nunaqarfimmiunit illu sullissivimmik, tassa cafémik, internettimik, amminut mersortarfimmik, ujaqqanik sanaluttarfiusinnaasumik, il.il. pilersitsisoqarnissaa kissaatigineqarpoq.  Qinigassaq alla tassaavoq katersortarfiup B-798-ip, atuarfitoqqap B-111-ip uffartarfiullu B-1182-ip iluarsaanneqarnerisigut Illu Sullissivimmik pilersitsisoqarsinnaanera. Taassuma saniatigut nunaqarfimmi illut eriagissassaqqissut ilaata 1800-kkunnisullu isikkoqalersillugu pisatsersorneqarnissaa kissaatigineqarpoq, taamaalilluni nunaqarfiup kulturikkut assersuutitut takussutissaaniassammat. Takornariat amerlanerulernissaat siunertaralugu aalisariartitsinissamut piniariartitsinissamullu neqerooruteqartoqarsinnaavoq. Taamatuttaaq nunaqarfiup allaffiata ineeraani tikeraartut unnuiffissaliuunneqarsinnaanerat takorloorneqarsinnaavoq. Kiisalu Isortumi takornariaqarfioreersumi suleqatigiinnikkut aavariartitsineq aalisartitsinerlu ineriartortinneqarsinnaapput.

 


Pilersuisoq i Qasimiut



Postboks 514 • 3920 Qaqortoq • Grønland • Telefon: +299 704 100 • www.kujalleq.glarealadm@kujalleq.gl