Logo
 
Vision og hovedstrukturAnguniakkatIlloqarfiit NunaqarfiilluAsimi nunaUani nunaminertamik qinnuteqarsinnaavutitIlloqarfiit NunaqarfiilluTusarniaanermi pilersaarusiat nutaat

Narsarmijit


Kommunip nunaqarfiinit Prins Chrisitians Sundip kitaata isuaniittoq Narsarmijit kujasinnersaavoq.  Nunaqarfik 2016-imi januaarimi 88-inik inoqarpoq. 1824-mi Herrnhut-init qatanngutigiinnianeersunit Narsarmijit ajoqersuisoqarfittut tunngavilerneqarpoq.  1906-mi palasi Jens Chemnitz siullermeerluni savaateqarfiliornialeqqaarami Kalaallit Nunaanni misileeqqaarsimavoq.  Nunaqqarfimmi 1934-miit 1987-ip tungaanut Amerikamiut radioqarfeqarsimanerat 1960-miillu 1990-ip tungaanut Stor Nordiske station ”Icecan”-imik taaguuteqartumik nunaqarfimmi radioqarfeqarsimanera peqqutalluni nunaqarfimmiit avammut attaveqarneq annertoorujussuusimavoq.  Ullumikkullu pineqartoq kingulleq Nuna-Tek Tele-mit pisiarineqarnikuuvoq.

Nunaqarfiup annersaata qattunerasaartuunera peqqutaalluni alliliisoqarnissaanut periarfissaqarluarpoq. 

 

Inuit illoqarnerlu

2000-imiit 2009-ip tungaanut innuttaasut 120-iusut amerlassusaat nikerarsimapput Ukiut kingulliit arfineq pingasut innuttaasut 90-it missaanniittarsimapput. Piffissami pilersaarusiorfiusumi innuttaasut aalaakkaasuunissaat naatsorsuutigineqarpoq. Piffissami pilersaarusiorfiusumi naatsorsuutigineqarpoq utoqqaat amerleriassasut.

 

2016-imi innuttaasut 14%-ii kisimik 15-inik ukioqarput Meeqqat atualersimanngitsut ikitsuararsuupput taamaammat ukiuni tulliuttuni atuartut ikinnerulersimanissaat naatsorsuutigineqarpoq. Ukiumi atuarfiumi 2016-17-imi allatsittut arfineq marluupput.

 

Narsarmijini ilaqutariinnut ataatsinut arfarleriikkuutaanulluunniit illoqarpoq.  Illut pisoqaassusaat apeqqutaalluni pitsaassusaat annikinneruvoq. Taamatuttaaq illut ilaat mikisuararsuupput.  Illut arlaannaalluunniit kuuffeqanngilaq.  Illut amerlanersaat kallerup inneranut atassusiligaapput.  Illut ikinnerit ukioq kaajallallugu imermik kuuinnartoqarput.

Innuttaqassutsip aalaakkaasuunissaa naatsorsuutigineqarnera pillugu, amerlanerusunik inissialiortoqarnissaa ilimananngilaq.  Piffissami pilersaarusiorfiusumi illunik ataasiakkaanik sanasoqarnissaa naatsorsuutigineqarpoq Illutoqqallu iluarsaatiinnagassat ullutsinnullu naleqqukkunnaarsimasut nutaat ilaannik taarsersorneqarnissaat naatsorsuutigineqarpoq.

 

Umiarsualivik inuussutissarsiornerlu

Nunaqarfimmi aalisarneq, piniarneq illunilu sullissivinni, soorlu KNI, atuarfik, kommunip allaffia nukissiorfillu innuttaasunit inuussutissarsiutigineqarput.

1997-imiilli talittarfik nunniugaq 5 meterisut itissuseqartoq suli atorpoq.  Piffissami pilersaarusiorfiusumi aallilerneqarnissaa naatsorsuutigineqanngilaq. 

2010-mi ukiaagaa talittarfik nunniugaq anorersuaqarnerata kingunerisaanik ajoquserpoq, kingornalu atoqqinnikuunani. 80’-ikkunni sananeqarami qerititsiveqanngilaq. Annerusumillu aalisakkanik - uukkanik saarullinnillu tarajortikkanik tunisassiorneq ingerlanneqarsimavoq.

Nunaqarfiup eqqaani natsersuarnik, natsernik aataarsuarnillu piniagassarpassuaqarpoq.

Ukiuni kingullerni paarnanik, kigutaarnanik kuannernillu tunisassiorfimmut tunisisoqartarpoq.  Nunaqarfimmi nunalerinermik aallarnisaanissamik periarfissaqarluarpoq.

 

Narsamijini sanaartornerit ingerlareersut sanaartornerillu

Illut sullissiviit takuniarukkit nunap assinganiittut toorlugit takusinnaavatit

Narsarmijini atuarfik nunaqarfimmi nunaqavissunik atuartoqartarpoq.  Atuarfik 1 – 7 klassimiit atuartoqarlunilu 40-inut inissaqarpoq.  Atuarfik 1966-imi sananeqarpoq. Kingullermillu 1981-imi ilaneqarlunilu iluarsaanneqarpoq Toqqaviatalu ilassutaaniittup qajannaatsuunnginnera peqqutaalluni atuarfik kiviartulersimavoq.  Taamaammat piffissami pilersaarusiorfiusussami nalilersorneqassaaq atuarfik qanoq iluarsaanneqassanersoq.

 

1962-mi ilaqutariinnut ataatsinut illuliaasimasumut Narsarmijini allaffissanngorlugu aaqqissuunneqarsimavoq.  Allaffimmioqarpoq ulluinnarni suliasanik isumaginnittuusumik.  Nunaqarfiup allaffiata allineqarnissaanik pilersaaruteqartoqanngilaq.

Illu sullivik errorsisarfeqarpoq aammalu uffarfeqarluni, sanaluttarfeqarluni ataatsimiittarfeqarlunilu.  Ulluuneranilu illu meeqqerivittut atorneqartarpoq.

Narsarmijini nunaqarfimmi nakorsiartarfik Nanortallup napparsimaviata ataaniittoq peqqissaasutut ikiortimik sulisoqarpoq.

Qatserisartoqarfimmiipput motorinik ingerlatallit qatserinermi pumpet, qatserutit kiiisalu putsumut pulalluni qatserinermi atortut.  Nanortalimmi brandinspektøri qatserisartoqarnermut aqutsisuuvoq.

Nunaqarfiup sannavia nunaqarfimmiut umiatsianik iluarsaassivigisinnaavaat.  Sanaluttarfik ajungaarmat isaterneqarlunilu sanaqqinneqartariaqarpoq. 

Nunaqarfik nammineq pisiniarfeqarpoq ulluinnarni pisariaqartitanik nioqquteqartuusumik.

 

Katersortarfitoqaq – B-131 katersugaasivinngortinneqarnikuuvoq. B-131, B-775, aamma B-782 eriagisassaqqissuupput.

 

Narsarmijini teknikkikkut atortorissaarutit

Teknikkikkut atortorissaarut nunap assingani takukkit

Nukissiuuteqarfik 2010-meersuuvoq nunaqarfiup kangiata tungaaniippoq. Nukissiuuteqarfimmi pingasunik sarfaliuuteqarpoq, DIEF–styringimik taaneqartumik peqarpoq tannalu ungasianiit aqunneqarsinnaalluni.

 

Imeqarfik nutaaq 2015-imi atulerpoq, taannalu nunaqarfiup kangiata tungaaniilluni. Tele-p kujataata tungaani kuummiippoq ningaliusanik puilasuliaq imermik katersuiviusartoq.  Imeq imeqarfimmit nunaqarfiup kuutsitsiviinut ingerlatinneqartarpoq.

 

Nunaqarfiup kangiata tungaani mittarfeeraqarpoq. Mittarfeerarlu aalajangersimasumik nunaqarfimmiunik timmisartuussinermi atorneqartarpoq.

Ammassivimmi aqqusineqarpoq aqqusineeraqarlunilu.   Aqquserngit ujaraaqqanik sanaajupput kommunip aningaasaatai atorlugit suliaallutik.

 

Kommuni eqqaavinnik imaarsisitsisarpoq.  Eqqakkat nalinginnaasut kommunimi eqqagalerinermut malittarisassat malillugit isumagineqarput. Eqqakkat kommunip eqqavissuaqarfianut assartorneqartarlutillu anartarfiit puukuinut ilaliullugit ikuallanneqarlutillu poortorneqartarput.  Kommunip eqqagassalerinermut malittarisassai naapertorlugit anartarfiit isumagineqartarput. Kangerlummut anartarfikut saleqqaarnagit imaarneqartarput.  Imikoorutit salinneqaratik nunamut kuutsinneqartarput immamullu kussiorneqartarlutik.  Piffissap pilersaarusiorfiusup ingerlanerani pisortat aaqqissugaannik kuuffilersuisoqarnissaa naatsorsuutigineqanngilaq.

 

Nunaqarfiup kangiatungaani ippoq nalunaarasuartaatinut atortorissaaruteqarfik mittarfeerartalik.

Arsaattarfik nunaqarfiup avannarpasissuata ilaaniippoq.

Iliveqarfik nunaqarfiup avannaata tungaaniiippoq.  Pisariaqartitsineq naapertorlugu oqaluffik allilerneqarumaarpoq.

 

Nunaminertat piumasaqaatitaqarfiusut

Qulimiguullit mittarfiat, orsussaassiviit aammalu imeqarfiit eqqaat innimigisassanik killiligaapput.  Nalunaarasuartaateqarfik asserneqartussaangitsunik killiligisaqarpoq mianerisassaasunik, kiisalu eqqaavik ikuallaavillu illunut qaninnernut naammattumik ungasissuseqartussaapput.

 

Nunaqarfiup ineriartortinnissaanut pilersaarut

Narsarmijini nunaqarfiup ilusaa peqqutaalluni allilerinissamut periarfissaqarluarpoq.  Piffissamilu pilersaarusiornerup nalaani aningaasat atorneqartussatut missingiunneqarsimasut ineriartortitsinissamut apeqqutaassapput.  Nutaanik inissialiortitiutigaluni inissianik aserfallassimasunik taarsersuisoqarsinnaavoq.

 

Nuna iliveqarfiup eqqaaniittoq alliliinissamut atorneqartussanngorlugu immikkoortinneqarnikuuvoq. Kisiannili nuna pisiniarfiup eqqaaniittoq atuarfiliornissamut immikkoortinneqarpoq.  Nunat talittarfiup eqqaaniittut talittarfiup kiisalu qeqqussanik  panertunik tunisassiorfimmut inerisaanissamut immikkoortinneqarput.

Narsarmijini ukiuni kingullerni nipisaat suaannik tunisassiornerup saniatigut paarnanik, kigutaarnanik, kuannernik kissalu saarullinnik uukkanillu tarajortigassanik tunisisoqartarpoq.  Taamatuttaaq inuussutissanik tunisassiornissamut ineriartortitassarpassuaqarpoq.

Nunaqarfiup tunuani nunaleriffiginissaanut piukkunnartumik nunarujussuaqarpoq. Naatsiianik grønsaginillu naatsitsinissamut amerlasuunik soqutiginnittoqalereerpoq


Narsarmijit



Postboks 514 • 3920 Qaqortoq • Grønland • Telefon: +299 704 100 • www.kujalleq.glarealadm@kujalleq.gl