Ataatsimut aalajangersakkat

Kommunimut pilersaarusiap immikkoortuani matumani ”ataatsimut aalajangersakkat” qassiit suliarineqarsimapput, taakkulu Kommune Kujallermut tamarmut atuuttuupput taamaammallu ”immikkoortortanut ataasiakkaanut aalajangersakkani” saqqummiuteqqinneqaratik. Ataatsimut aalajangersakkat kommunalbestyrelsip pilersaarusiorneranut nunaminertanillu atuinermik aqutsinermut pituttuisuupput.

1.      Aqquserngit

1. Illoqarfinni asimilu aqqusinerngit pioreersut sananeqarumaartussallu eqqaanni aqquserngup qeqqaniit 7,5 meterit iluanni aqqusinilerinermut (iluarsaassinermut, aputaajaanermut il.il.) akornutaasinnaasunik sanaartortoqaranilu atortulersuisoqassanngilaq.
2. Illoqarfinni aqquserngit minnerusut nunaqarfinnilu aqquserngit eqqaanni aqquserngup qeqqaniit 5 meterit iluanni aqqusinilerinermut (iluarsaassinermut, aputaajaanermut il.il.) akornutaasinnaasunik sanaartortoqaranilu atortulersuisoqassanngilaq. 
3. Kommunimut pilersaarummi aalajangersakkani sukumiinerusuni a. aamma b.-mi taaneqartuniit ungasinnerusumi sanaartornermut killiliussanik tamatigut aalajangersaasoqarsinnaavoq.

2.      Biilit unittarfii

Nutaanik inissialiornermi, sullissiviliornermi (soorlu pisortat sullissiveqarfinni allanillu) aammalu inuussutissarsiorfiliornermi naammattunik biilinut unittarfiliortoqartassaaq. Kommunimut pilersaarummi sukumiisumik aalajangersakkatigut allanik aalajangersaasoqarsimatinnagu (illoqarfiup ilaanut pilersaarutini allanilu) makku minnerpaamik piumasaqaataasarput.

1. Ilaqutariinnut illuliani arlalinni inissianut marlunnut unittarfik ataaseq, aammalu
2. Sullissiveqarfinni inuussutissarsiorfinnilu quleriilinnut 50 m2-mut unittarfik ataaseq
3. Allanut immikkut ittumik atorneqartussanut pisariaqartitsineq naliliivigineqartassaaq

Biilit unittarfii nunaminertamik atugassanngortitsinermi allassimasassapput.

3.      Nunaminertat atorneqanngitsut

Sumiiffiit ilaannut aalajangersakkani nunaminertatut atorneqanngitsutut aalajangerneqareersimasut saniatigut nunaminertat siunertanut allanut atugassanngortinneqarsimanngitsut nunaminertatut atorneqanngitsutut aqunneqassapput. Nunaminertat atorneqanngitsut atortulersuiffigineqassanngillat, toqqorsiviunatik torersuutinneqassallutillu.

4.      Pinnguartarfiit

Arfinilinnit amerlanerusunik inissiartalinnik inissialiortoqartillugu meeqqanut pinnguartarfiliortoqartassaaq.

5.      Innarluutilinnit tikinneqarsinnaaneri

Aqquserngit, pisuinnaat aqqutaat, illutat atortoqarfiillu allat kikkunnilluunniit orninneqarsinnaasut sananeqartillugit innarluutilinnit tikinneqarsinnaanissaat anguniarneqartassaaq. 

6.      Illut eqqissisitat

Illut atortoqarfiillu eqqissisitat (suussusii 1) Nunatta Katersugaasivia Toqqorsivialu akuersisimatinnagu piiarneqassanngillat, allanngortiterneqassanatik allatulluunniit allanngortinneqassanatik. Illut eqqissisitat allassimapput uani. Fredede_og_bevaringsvaerdige_huse.pdf (93.4 KB)

7.      Illut eqqissittarisassat

Illut atortoqarfiillu eqqissisittarissat (suussusii 2) kommunalbestyrelsi akuersisimatinnagu piiarneqassanngillat, allanngortiterneqassanatik silatimikkulluunniit allanngortinneqassanatik. Nunatta Katersugaasivia Toqqorsivialu oqaaseqaateqartinneqartassapput. Ullut taakku eqqissisinneqarsinnaanerat siunertaralugu kommunalbestyrelsi naliliisassaaq. Illut eqqissitittarissat allassimapput uani.  Fredede_og_bevaringsvaerdige_huse.pdf (93.4 KB)

8.      Illut eriagisassat

Illut atortoqarfiillu eriagisassat (suussusii 3) sapinngisamik allanngutsaaliorneqassapput allannguutissatullu qinnuteqaatigineqartunut kommunalbestyrelsi piumasaqaateqarsinnaavoq illup eriagisariaqassutsi pigiinnarniassammagu. Illut eriagisassat allassimapput uani.  Fredede_og_bevaringsvaerdige_huse.pdf (93.4 KB)

9.      Illut peerneqariaannaat

Illu ima ajortissimatigiguni allanut navianartorsiortitsisinnaalluni, imalunniit qimanneqarsimaguni aammalu nunaminertamik atugassanngortitsinermi siunertaasutut atorneqarunnaarsimaguni inatsisinut naapertuuttunngortinneqassaaq (iluarsarneqarluni/atorneqalerluni imaluunniit ingutserneqarluni).

10.  Illoqarfinni nunaqarfinnilu pilersuiviit

Tamatumunnga periarfissaqarnera oqaatigineqarsimappat ajornanngippallu nutaamik sanaartorfiit innaallagissamut, imermut kuuffinnullu kikkunnit tamanit atugassianut aqquserneqarnissaat qularnaarneqassaaq.

Kuuffinnut kikkunnut tamanut atugassianut attavilernissaq ajornarpat imermik errortuutikumik anartarfinneersunillu eqiterivissamik tankiliortoqarnissaa imaluunniit avatangiisit pillugit aalajangersakkat qaqugukkulluunniit atuuttut aammalu errortuutikup anartarfiillu imaarneqartarneri pillugit malittarisassat naapertorlugit erngup igitassap suliarineqarnissaannik Kommunalbestyrelsi piumasaqaateqarsinnaavoq.

Imeq nunap qaatigoortoq, aamma qalianeersoq, eqqakkanut kuuffinnut tamanit atugassianut ingerlatinneqartassanngilaq, kisiannili eqqaamiorisat illuinut, aqqusinernut, pisuinnaat aqqutaannut aammalu illuliorfiusimanngitsunut akornutaasussaajunnaarlugu ingerlaartinneqartassalluni.

Erngup, innaallagissap kuuffiillu aqqutaat, tv-kabelit assigisaallu ajornartinnagu nunap iluatigoortinneqartassapput.

Pissutsit immikkut ittut pissutigalugit pisariaqalinngippat pilersuinermut aqqutit qarsullugit sanaartortoqassanngilaq qajanaaqqusersuisoqassananiluunniit.

11.   Asimi pilersuinermut atortorissaarutit

Eqqagassat imerpalasuunngitsut asimi sanaartornermeersut piginnittumit ikuallanneqanngikkunik aallarunneqassapput. Ikuallanneqarnerat illulianut pinngortitamulluunniit eqqaaniittumut navianartorsiortitsissanngilaq imaluunniit allanut akornutaassanani.

Arnartarfinnut anartarfiit spandii/puusiat, imaanut kuineqartussat, assaanneqartussat, asiutinneqartussat allatulluunniit allanut akornutaanngitsumik avatangiisinullu ajoqutaanngitsumik iginneqarsinnaasut atorneqassapput.

Illut pioreersut kuiasakkanik anartarfillit eqqarsaatigalugit piginnittup imeq atornikoq allanut avatangiisinullu ajoqutaanngitsumik igittassavaa.

Innaallagissiutinik atuineq sapinngisamik allanut ajoqutaannginnerpaamik pisassaaq. Asimi illuni atugassanik nukissiorneq seqinermit nukiussutit pinngortitamiillu nukissiutit allat atorlugit pisassasoq kaammattuutigineqarpoq.

12.  Containerit

Containerit ineqarfiusuni (A) aammalu qitiusoqarfinni (C) ataavartumik inissisimatinneqarnissaat akuerineqanngilaq. Containerit qalliutaannut, qalipaataannut atorneqartarnerannut kiisalu inissinneqarfigisaminni tulluarsarneqarnissaannut piumasaqaateqarsimatillugu immikkut ittunik akuersissuteqartoqarsinnaavoq.

13.  Angallatinik inissiineq

Ukiuunerani angallatinik inissiinermut akuersissuteqartoqarsinnaavoq angallammik piginnittup illutaata eqqaanut (piginneqatigiiffiuppat attartortittagaappalliuunniit piginneqatigiit / piginnittut akuersineratigut), suliffeqarfiup angallataatillup attuumassuteqarfigisaata eqqaanut imaluunniit kommunip angallatinik inissiivissatut immikkoortitaanut.