Logo
 
Takorluukkat aaqqissuussaanerullu ilusissaaAnguniakkatIlloqarfiit NunaqarfiilluAsimi nunaUani nunaminertamik qinnuteqarsinnaavutitIlloqarfiit NunaqarfiilluTusarniaanermi pilersaarusiat nutaat

Aammassivik


Ammassivik Alluitsup kangerluata alannguaniippoq. Nunaqarfik 1889-imi inoqaleqqaarpoq oqaluffillu atuarfiutigisoq qatanngutigiinnianit 1899-imi sananeqarluni. Nunaqarfilli aatsaat 1922-imi niuertoruseqarfinngorpoq. Nunaqarfik ukiorpassuarni savaateqarnermut qanittuusimavoq nunaqarfiullu qeqqani narsaaterujussuaqarluni siornagut savaateqarfiusimagami. Ammassivik 2016-mi januarip aallaqqaataani 32-inik inoqarpoq

Ammassivimmut ungasinngitsumi ipput savaateqarfiit Qallimiut kiisalu Qorlortorsuaq. Kingulleq nunatsinni annerpaamik qorlortorsuaqarpoq innaallagissiorfiusimasumik.

 

Inuit illoqarnerlu

1990-imiilli inuit ikiliartuinnarsimapput. 2005-2010-imi inuit 70-it missaanniillutik aalaakaasimapput. 2011-2016-imiit inui 70-iniit affaajunnaarlutilluunniit 32-inngorput. Nunaqarfimmi pisortat sullissinerat naammattutut isigineqarpoq piffissallu pilersaarusiorfiusup ingerlanerani allilerinissaq atorunnaarsitsinissarluuniit naatsorsuutigineqarani.

Ammassivimmi illut ataasiakkaaginnaapput. Illut pitsaavallaanngillat inoqanngitsullu amerlakulullutik, taamaammat ajornersaasa piiarneqarnissaat suliassani salliutinneqarpoq. Illut arlaannaalluunniit kuuffeqanngilaq. Illut amerlanerit innaallagiaqarput imeqaratilli. Illut ataasiakkaat imermut aqqusersugaapput tankeqarlutik imertartarfimmiit sullulimmik immerneqarsinnaasunik. Amerlanerusunik illuliortoqartariaqalernissaa naatsorsuutigineqanngilaq, kisiannilli illut aserfallassimasut piiakkallu taarserneqartariaqarput. Illut nutaat ataasiakkaat illuliaareersunut naleqqussarneqarsinnaapput.

 

Umiarsualivik inuussutissarsiornerlu

Suliffeqarfiit pingaartumik aalisarnermut piniarnermullu attuumassuteqarput. Aammattaaq sullissinermik inuussutissarsiortoqarpoq, soorlu pisiniarfimmi, atuarfimmi kiisalu kommunip suliffiini allaffianilu.

Sissiugaq umiarsuaaqqanut assigisaanullu talittarfeqarpoq kiisalu umiatsianut puttasoqarluni. Pisariaqartitsisoqarpat amerlanerusunik puttasuliortoqarsinnaavoq.

Sissiukkamut atasumik tunisassiorfeqarpoq, annermik saarullinnik panertiterisuusumik. Tunisassiorfik 2016-imi ingerlalluarpoq. Nunaqarfimmi tulaassisoqarneq ajorpoq, aalisakkalli Qaqortumiit pisiarineqartarlutik. Aalisakkerivik 1946-imili nunaqarfimmi ingerlasimavoq. Massakkut tunisassiorfiusoq qatanngutigiinnit Elias aamma Ortooraq Nielsenimit pigineqarpoq - tassa suliffeqarfimmit Asimit Aps 2009-imeersumit. Ilaanneeriarluni nipitsat suaannik, saarullinnik aammalu paarnanik pisiortortoqartarpoq.

Ukiuni kingullerni nunaqarfimmi nunalerinermik ingerlatsisoqarsimanngilaq, 2010-mili nunalerinermiit tunisassiulernissaq siunertaralugu qassiinik iliuuseqartoqarpoq (ilaatigut naatsiiaanik tunisassiorneq eqqarsaatigalugu) aammalu Ammassivimmi savaateqarfiliortoqarsinnaanera pillugu Nunalerinermi Siunnersorteqarfik pilersaarusiorsimavoq.

 

Sullissiviit

Atuarfiusimasoq B-1298 katersortarfittut atorneqarsinnaalerniassammat iluarsarneqarnissaa kissaatigineqarpoq.

Qatanngutigiinniat oqaluffiat atuarfiutigisoq 1899-imi sanaajuvoq eriagisasaallunilu.

Ammassivimmi utoqqaat illoqarpoq 1988-imi sanaajusumik. Utoqqaat illuat maanna matuneqarsimavoq 2016-imilu inoqarani.

Illut ilaanni nunaqarfimmi allaffeqarpoq. Allaffimmioqarpoq ulluinnarni suliasanik isumaginnittuusumik. Nunaqarfiup allaffiata allineqarnissaanik pilersaaruteqartoqanngilaq.

Illu sullivik, nakorsiartarfik aammalu qatserisarfik illumi ataatsimiipput. Piffissami pilersaaruteqarfiusumi alliliinissamik pilersaaruteqartoqanngilaq.

Ammassivimmi kommunip atuarfiani atuartut nunaqarfimmiuupput savaateqarfinnillu eqqaaneersuullutik. Atuarfik 1.-7. klassinik atuartoqarpoq ukiumilu atuarfiusumi 2016/2017-imi pingasunik atuartoqarluni. Piffissami pilersaarusiorfiusumi atuartut amerliartussangatinneqarput, atuarfiulli allisariaqalernissaa naatsorsuutigineqarani.

Nunaqarfik nammineq pisiniarfeqarpoq ulluinnarni pisariaqartitanik nioqquteqartuusumik.

Nunaqarfiup sannavia nunaqarfimmiut umiatsianik iluarsaassivigisinnaavaat. Piffissap pilersaarusiorfiusup ingerlanerani sannavik nutarterneqassaaq.

 

Ammassivimmi atortorissaaruteqarfiit 

Teknikkikkut atortorissaarut nunap assingani takukkit

Nunaqarfiup kippasissuani innaallagissiorfiit marluk ipput. Innaallagissiorfik nutaaq nunaqarfimmut innaallagissamik pilersuisuusoq kiisalu innaallagissiorfitoqaq iluarsaassisarfittut unnuisarfittullu atorneqartoq.  Innaallagissiorfik 2017-imi nutartilersaarneqarmat motorit marluk kiisalu tavlit taarserneqassapput. 

 

Nunaqarfik tatsimik nunaqarfimmiit 600 meterinik kujasinnerusumiittumik imeqarfeqarpoq, tassanngalu imeq nunaqarfiup imeqarfittaavanut 2015-imi atulersumut ingerlanneqartarpoq, imerlu salitaq imertartarfinnut ingerlaqqittarluni. 2015-imi imeq suliarineqanngitsoq nutaanik aqqusiorneqarpoq, maannalu tatsimiit milluaalluni imeqarfik tassuuna imermik pilersorneqalerlunil. Tasermi imeqarfiusumi marlunnik saputeqarpoq naammattumik imeqartitsiniartuusumik taamalu nunaqarfimmut imermik pilersuinermik aalaakaatitsisuusumik. Imermik pilersuineq naammappoq.

Nunaqarfiup kangiatungaaniippoq qulimiguulinnut mittarfik nunaqarfimmut aalajangersimasumik angallassisarnermi atorneqartartoq. Mittarfiup eqqaani illuaraliortoqarnissaa nunaqarfimmiunit kissaatigineqarpoq. Kangia-tungaani aamma ipput nalunaarasuarnermi atortorissaarutit mittarfittallit.

Kommuni eqqaavinnik imaarsisitsisarpoq. Eqqagassat ikuallaaviliaanneqartarput taavalu arsakut ikumasinnaanngitsullu matoorunneqartarlutik. Eqqagassat anartarfiillu puusiartakui ikuallaavimmi ikuallanneqartarput. Anartarfiit puusiartaat katersorneqartarput imaallu salinneqaratik kuineqartarlutik. Imikoorutit salinneqaratik nunamut kuutsinneqartarput immamullu kussiorneqartarlutik. Piffissap pilersaarusiorfiusup ingerlanerani pisortat aaqqissugaannik kuuffilersuisoqarnissaa naatsorsuutigineqanngilaq.

Arsaattarfik Ammassiviup avannannguaniippoq. Iliveqarfik nunaqarfiup kujataani ippoq. Pisariaqartitsineq malillugu iliveqarfik kangimut kimmut allineqassaaq.

Ammassivimmi aqqusineqarpoq aqqusineeraqarlunilu. Aqquserngit ujaraaqqanik sanaajupput kommunip aningaasaatai atorlugit suliaallutik. Aserfallatsaaliinermut aningaasartuutit kommunimit akilerneqartarput.

Qulimiguullit mittarfiat, orsussaassiviit aammalu imeqarfiit eqqaat innimigisassanik killiligaapput. Nalunaarasuartaateqarfik asserneqartussaangitsunik killiligisaqarpoq mianerisassaasunik, kiisalu eqqaavik ikuallaavillu illunut qaninnernut naammattumik ungasissuseqartussaapput.

 

Nunaqarfiup ineriartortinnissaanut pilersaarut

Illunik ingutserisoqartariaqaqaaq. Illunik ingutserisoqartariaqaqaaq. Illut B-234A, B-234b, B-565, B-569, B-600, B-601, B-903 kiisalu B-905 ajungaaramik ingutsertariaqaraluarput, illulli allat, aamma atuarfiusimasoq, nutarterneqareerlutik atoqqinneqarsinnaapput. Illut atareersut akornanni imaluunniit ingutsikkat nalaanni nutaanik illuliortoqarsinnaavoq.

B-180-ip saavani pinnguartarfiliortoqarnissaa nunaqqatigiinnit kissaatigineqarpoq, iliveqarfilu alliffissaqartinneqassalluni. Piffissap pilersaarusiorfiusup ingerlaneranni iliveqarfik allisariaqalissangatinneqarpoq. Nunaqarfiup qeqqani narsaataasimasoq sanaartorfigineqassanngilaq, kisiannili sunut kikkunnit tamanit atugassanut imaluunniit inuussutissarsiornermut atugassanngortinneqarsinnaalluni.

Nunaqarfimmi inuussutissarsiornikkut ineriartorneq annermik piniarnermut aalisarnermullu kiisalu umiarsuliavimmi tunisassiornermut attuumassuteqarpoq kiisalu nunalerinermut soorlu naatitanik tunisassiornermut (katorfilit) aammalu savaateqarnermut attuumassuteqarluni..


Ammasivik



Postboks 514 • 3920 Qaqortoq • Grønland • Telefon: +299 704 100 • www.kujalleq.glarealadm@kujalleq.gl