Logo
 
Vision og hovedstrukturAnguniakkatIlloqarfiit NunaqarfiilluAsimi nunaUani nunaminertamik qinnuteqarsinnaavutitIlloqarfiit NunaqarfiilluTusarniaanermi pilersaarusiat nutaat

Isumaginninnikkut pissutsit


Toqqissisimasumik inuuniarnermi atugassat

Nunatsinni maanilu Kommune Kujallermi innuttaasut inuunermik aamma inuunermik atugarissaarfiusumik imminnut qaniginerpaasamillu ineriartorfigisinnaasaannik pilersitsinissamut periarfissinneqartariaqarput.

Innuttaasuli ilarpassui namminerisamik inuuniarnermik tarnikkut, inuttut minnerunngitsumillu aningaasatigut atugarissaarfigisaminnik, taamaalillutik imminnut pilersorsinnaalerlutik, pilersitsinissaminnut tapersersorneqarlutillu tapersersorneqarlutillu siunnersorneqartariaqarput.

Ilaqutariippasuit aningaasatigut killilinnik sillimmataateqarput tamannalu assersuutigalugu innuttaasut sumiginnagaanerannik, inissaaleqisarnerannik, aanngajaarniutinik atornerluisarnerannik, imigassamik atornerluisarnerannik aamma sakkortuumik nakuuserniartumillu pissusilersortarnerannik kinguneqartarpoq.

Taamaattumik Kommune Kujallermi inuit ataasiakkaat pillugit aaqqiissutissanik nassaarniarluni innuttaasunik tigussaasumik oqaloqateqarnissaq suliassarineqarpoq. 

 

Anguniakkat: 

  • Ilaqutariinni avatangiisinilu qaninnerpaani pitsaasumik atugaqarluni peroriartornissaq qularnaarneqassasoq.
  • Meeqqerivissaqartitsinikkut, siunnersuisarnikkut kajumissaataasunillu suliniuteqarnikkut ilaqutariit meerartallit sullinneqarnerat nukittorsarneqassasoq.
  • Sumiginnaaneq (sumiginnaaneq, imigassamik atornerluineq, peqqarniilliorneq) pillugit immikkut iliuuseqassalluni, soorlu illoqarfinni pingasuni tamani ilaqutariinnut sullissiviliornikkullu assigisaatigulluunniit.
  • Utoqqaat innarluutillillu sapinngisamik sivisunerpaamik namminneq angerlarsimaffimminni najugaqartassasut, tamatumanilu avatangiisit (aqquserngit, pisuinnaat aqquserngi atortulersuutilu allat) utoqqaat innarluutillillu isumagalugit ilusilersorneqartassasut
  • Utoqqaat innarluutillillu nammineersinnaanngitsut paarineqarfissaminnik neqeroorfigineqassasut, taamaaqataanillu utoqqaat nammineersinnaanerusut najukkaminni inissanik naleqquttunik pissaqartinneqassasut.
  • Illoqarfinni pingasuni utoqqaat iluini atukkat assigiissarneqassasut angerlarsimaffiillu nutaalianngortinneqassasut

 

Ikiuineq pinaveersaartitsinerlu (ilaqutariinnut allanullu)

Kommune Kujalliup ikiuisarneq pinaveersaartitsinerlu aaqqissuussimavai ingerlatsivimmi ataatsimoortussanngorlugit, taannalu Qaqortumi qullersaqarfeqarpoq illoqarfinnilu pingasuni tamani immikkoortortaqarfeqarluni kiisalu nunaqarfiit allaffiini aqqanilinni nunaqarfimmiunut saaffiginittarfeqarluni.

Suliffissaaleqisunut, napparsimasunut ajutoorsimasunullu annertussusileriikkamik, pisariaqartitsineq naapertorlugu ikiorsiissutinik ataasiartumillu ikiorsiissutinik aamma suliffeerukkallarnermi ikiorsiissutinik kommunip ikiuisarnermi saniatigut aqqutissiuinermik, katsorsaanermik allatigullu inunnut ataasiakkaanut ikiuinermik neqerooruteqartarpoq.

Taamalu Qaqortumi ilaqutariinnut sullissivimmik pilersitsisoqarsimavoq, taannalu meeqqanut inuusuttuaqqanullu aammalu ilaqutaannut ajornartorsiortunut siunnersuisarpoq, aqqutissiuisarluni pikkorissaasarlunilu. Narsami multicenter "Ujuaat" pilersinneqarsimavoq taannattaarlu ikiuisarlunilu pinaveersaartitsinermik suliaqartarpoq, Nanortalimmiipporlu ornittagaq "Pilutaq" kiisalu Alluitsup Paani ornittagaq "Sikkersoq", taakkulu meeqqanut inooqatigiinnikkut ajornartorsiuteqartunik ilaqutalinnut ikiuisarput. Taamatuttaaq Narsami Qaqortumilu arnanut Qimarnguiit pisortanit tapiiffigineqartut aamma arnat arnanik ajornartorsiuteqartunik namminneq kajumissutsiminnik sullissiffiusumik peqarpoq.

 

Utoqqaat

Illoqarfinni pingasuusuni tamani Utoqqaat Illoqartiterpoq. Qaqortumi utoqqaat illuat Ajarsivasik nutaajunersaavoq aammalu inissanik 18-inik ilallugu nutarterneqaqqammerpoq, taamaalilluni maannakkut inissat 48-nngorlutik. Narsami Nanortalimmilu utoqqaat illui pisoqasaajupput aammalu inissanik amigaateqarlutik, nutarterneqartariaqarlutik allineqartariaqarlutillu. Nanortalimmi iluarsaassinissamik aamma alliliinissamik suliniut allartinneqaqqammerpoq.

 

Siunissami najugaqarsinnaasut amerlassusaat ’’aaqqissuussaanikkut politikkimi’’ suleqatigiit ’’utoqqarnik peqqinnermillu’’ suliaqartut aallaavigalugit ingerlanneqassaaq.

Illoqarfinni pingasuni utoqqarnut inissiaqarpoq, taakku utoqqaat illuannut atanngikkaangamik ikiorteqartinnerisigut tapersersorneqartarput.

Kiisalu illoqarfinni pingasuni utoqqaat katerisimaartarfiinik peqarnikuuvoq, taamaattorli maannakkut Qaqortumi Nanortalimmilu katerisimaartarfinnik amigaateqarput.

 

Nunaqarfinni Alluitsup Paani, Saarlumi Eqalugaarsunnilu utoqqaat najugaqatigiiffeqarpoq. Qassiarsummi ataasiakkaanik utoqqarnut angerlarsimaffeqarpoq nunaqarfiillu sinnerini utoqqaat angerlarsimaffii sapinngisamik utoqqarnut naleqquttuunissaat kommunip isumaginiarpaa.

 

Innarluutillit

Innarluutillit sapinngisamik namminneq angerlarsimaffimminniinnissaat inuiaqatigiinnullu akulerutsinneqarnissaat siunertaavoq, taamaammat illoqarfinni pingasuni tamani innarluutilinnut naleqqussakkanik inissiaqarpoq innarluutilinnut atortussanngortitaasimasunik ilusilersugaasunillu. Aammattaaq angerlarsimaffimmi nammineersinnaajumalluni iluaqutissanik kommune ikiuuttarpoq.

 

Illoqarfinni tamani inersimasunut annertuumik innarluutilinnut najugaqarfeqarpoq najugaqatigiiffeqarlunilu, kiisalu Qaqortumi Nanortalimmilu innarluutilinnut nakkutigisaasunik sulliveqarluni.

 

Peqqissuseq nappaatillu

Peqqissutsimik pitsaaliuilluni sulineq ilaatigut kommunimit isumagineqarpoq. Kommunimi pitsaaliunermut siunnersortit, meeqqeriviit, atuarfiit aamma ilaqutariinnik sullissiviit pitsaaliunermik qititsiutsisuupput aammalu peqqissuseq, pujortartarneq, atornerluineq il.il. pillugit ingerlaavartumik suliniuteqartarlutik.

 

Napparsimavimmi katsorsaaneq Namminersorlutik Oqartussat isumagisaraat. Illoqarfinni pingasuni tamani massakkut napparsimaveqarpoq nunaqarfinnilu nakorsiartarfeqarluni. Namminersorlutik Oqartussat peqqissaanikkut allanngortitereqqammermata Qaqortumi napparsimavik nunap immikkoortuani napparsimavittut toqqarneqarpoq napparsimaviillu sinneri marluk annikinnerusumik suliaqartitaallutik ingerlanneqassallutik. Aammattaaq kigutilerineq Namminersorlutik Oqartussanit isumagisarineqarpoq. Illoqarfinni pingasuni kigutileriveqarpoq, Qaqortumi Narsamilu atuarfinnut atasunik kiisalu Nanortalimmi napparsimavimmut atasumik.


 



Postboks 514 • 3920 Qaqortoq • Grønland • Telefon: +299 704 100 • www.kujalleq.glarealadm@kujalleq.gl