Logo
 
Vision og hovedstrukturAnguniakkatIlloqarfiit NunaqarfiilluAsimi nunaUani nunaminertamik qinnuteqarsinnaavutitIlloqarfiit NunaqarfiilluTusarniaanermi pilersaarusiat nutaat

Atuartitaaneq paaqqinnittarfeqarnerlu


Inuiaqatigiinni kalaallini ilinniartitaaneq ukiuni makkunani aallunneqaqaaq, tamatumanilu kommune pingaarutilimmik inissisimavoq. Meeqqat atuarfii eqqortumik imaqartariaqarput eqqortunillu illutaqartariaqarlutik aammalu illoqarfinni, nunaqarfinni kiisalu savaateqarfinni atuartitaanissamik neqerooruteqartoqartariaqarluni.

 

Meeqqat atuarfiannut tunngatillugu meeqqanut inuusuttunullu pingaaruteqarluinnarpoq meeqqat atuarfianneereerunik nunatsinni sumiikkaluarunilluunniit periarfissaasa assigiinnissaat. Tamanna najugaqarfiusuni minnerni meeqqat atuarfiata ineriartortinnerani immikkuullarissunik unammillernartoqarpoq.

 

Kisianni meeqqanut suli atualinngitsunut paarsinissamik neqerooruteqarnissaq meeqqat atuarfiattullu pingaartigaaq. Meeqqanut suli atualinngitsunut perorsaanikkut inerikkiartuutaasunik ulluunerani neqerooruteqartarneq pillugu Inatsisartut peqqussutaat pissutigalugu kommunimut tamarmut atuuttumik pilersaarusiortoqarsinnaavoq, paaqqinnittarfinni paarineqarnissamik neqerooruteqarfiuinnarani aammali atualertussat ineriartornissaat atualernissaminnullu piareersimalernissaat siunertaralugu sammisaqarfiusunik.

 

Anguniakkat:

  • angerlarsimaffiit suleqatigalugit ineriartortinneqartuartunik atuarfiit illuataqarnissaat, imaqarnissaat ilusilersugaanissaallu qularnaassallugu
  • meeqqat atuarfii atuartitsinermikkut ilinniarfinni ineriartoqqinnissamut patajaatsumik tunngaviussiuissasut
  • ilinniarfiit suleqatigiinerisigut atortorissaarutinillu ataatsimoorussanik pilersitsinikkut ilinniarfeqarfiit akornanni nukiit kattutissallugit.
  • ilaatigut ungasissumiit ilinniartitsisarnermik aallarniinikkut nunaqarfimmiut savaateqarfimmiullu meerartaasa ilinniartitaanikkut periarfissaat ineriartortissallugit.
  • illoqarfinni nunaqarfinnilu tamani perorsaanikkut peroriartuutaasumik sammisaqartitsinerit neqeroorutigissallugit.
  • atuarfinni paaqqinnittarfinnilu sulisut sulinermi ineqarnermilu kajungernartunik atugassaqarnissaat qularnaassallugu kiisalu sulisut piginnaanillit pigiinnarnissaat qularnaassallugu.

 

Paaqqinnittarfeqarnermi killiffik iliuusissallu:

Illoqarfinni pingasuusuni meeraaqqeriveqarpoq, meeqqeriveqarluni, saaniatigullu Qaqortumi ataatsimoortunik meeqqeriveqarluni. Nunaqarfiit eqqarsaatigalugit taamaallaat Alluitsup Paani Narsarsuarmilu ulluunerani paaqqinnittarfeqarpoq. Ulluunerani paaqqinnittarfinnik aaqqissuussinerup allanngortinneqarnissaa pilersaarutaanngilaq.

 

Kisianni meeqqeriviit arlallit pisoqalisimapput, nungullarsimallutik ataasiakkaallu oqoqalersimallutik, taamaattumik meeqqeriviit arlallit nutarsarnissaannik suliniutit annertuut pisussanngorput. Tassunga tunngatillugu meeqqerivinni kiffartuussineq pitsanngorsarniarlugu meeqqeriviit ataatsimoortinneqarsinnaanerat isumaliutersuutigineqassaaq.

 

Illoqarfiit ineriartornerat ilutigalugu meeqqeriviliortitsinissamik pisariaqartitsineq ingerlaavartumik nalilersorneqartassaaq, soorlu innuttaasut nooratarsinnaanerat inuillu katitigaaneranni allannguutit matusinermik tunngaviliisinnaanersut. Qaqortup illoqarfittut ineriartorfissai marluupput: i A11 (Qummut) aamma A5 (Alleriisanngivit), tamaanilu pisariaqartitsineq najoqqutaralugu siunissami meeqqerivissanut nunaminertanik immikkoortitsisoqareerpoq.

 

 

Atuarfeqarnermut tunngatillugu killiffik iliuusissanillu pilersaarutit

Illoqarfinni pingasunik atuarfeqarpoq 1. klassimiit 10. klasse tikillugu atuartitsiffiusunik. 2016-ip naalernerani atuarfinnik aserfallatsaaliinerit nutarsaanerillu Nanortalimmi, Qaqortumi Narsamilu naammassineqarput, illuutillu annertuumik pitsanngoriaateqarnerannik kinguneqarluni. Ilinniarsimasunik ilinniartitsisussarsiorneq suli ajornartorsiutaavoq, naak Qaqortumi ilinniarsimasunik kajungerilersitsineq iluatsissimagaluartoq.

 

2014-imi nunaqarfinni aqqanilinni tamani atuarfeqarpoq. 2015-imi Saarlumi atuartussaaleqineq peqqutaalluni atuarfik matuneqarpoq. Nunaqarfinni atuarfiit arlallit aammattaaq nungullarsimaqaat aserfallatsaalineqarnissaallu pisariaqalersimalluni, tassungalu ilanngullugu atuartut ikiliartorput ilinniarsimasunillu ilinniartitsisussaaleqisoqarluni, taamaattumik piukkunnaateqartumik atuartitsinerup attatiinnarniarneqarnera ajornartorsiutaavoq. Nunaqarfinni atuarfiit amerlanerit tallimat 20-llu akornanni atuartuuteqarput. Kisianni Igalikumi Qassimiunilu atuarfiit taama malittariillutik pingasunik marlunnillu atuartuuteqarput. Kiisalu 2016-imi savaateqarfinni meeqqat 18-it angajoqqaaminnit atuartinneqartarput. Kommune Kujalleq atuarfeqarnermut tunngatillugu pilersaarusiorniarpoq, siunissami atuartitsinermik aaqqissuussaaneq isummerfigissallugu, uuma ataani nunaqarfiit atuarfiisa attatiinnarnissaat eqqarsaatigalugu.

 

Meeqqat atuarfiisa saniatigut Kommune Kujalleq arlalinnik inuusuttunut aamma ingerlariaqqiffiusunik ilinniarfeqarpoq. Qaqortoq ilinniartitaanermut tunngatillugu illoqarfittut pingaarnertut inissisimavoq - tamaaniimmata Ilinniarnertuunngorniarfik, Niuernermik Ilinniarfik kiisalu Piareersarfik. Tamarmik illoqarfiup qiterpasissuani kuup kujataa-tungaani inissisimapput, tamaanissaaq kollegiat inissisimapput. Ilinniarfinnik avatangiiseqarneq ingerlaavartumik inerisarniarlugu kommunimut pilersaarummi nunaminermik immikkoortitsisoqarnikuuvoq, tassaniittussanngorlugu Ataatsimoorussamik Ilinniartitaanermik Sullissivik/Fælles Uddannelses Center, tassani ilinniarfeqarfiit ataatsimoorussamik sulliveqarfeqarniassammata aamma ilinniarfeqarfiit suliaminnut tunngatillugu paarlaasseqatigiiffeqarniassammata.

 

Narsami inuussutissalerinermik ilinniarfik INUILI kollegiarpaalunnik ungaluneqarsimasoq inissisimavoq, aammalu tamatuma nalaanut atuarfik ATI nuunneqarnikuuvoq. Nunap ilaa tamanna ilinniartitaanerup illuuteqarnikkut annertusarnissaanut kollegialiornissamullu suli periarfissaqarluarpoq. Narsami aammattaaq Piareersarfeqarpoq.

 

Nanortalimmi inuusuttut meeqqat atuarfianni naammassereersimasut atuartitaanikkut Piareersarfik periarfissatuaraat

 

 

 

 


GU Qaqortoq

 



Postboks 514 • 3920 Qaqortoq • Grønland • Telefon: +299 704 100 • www.kujalleq.glarealadm@kujalleq.gl